Pasagjerët që po arrijnë në Sydney, nuk po e dinë me saktësi nëse kanë arritur në qytetin e duhur – kjo për shkak të një mbishkrimi “Mirësevini në Perth” që është vendosur në kulmin e një ndërtese në afërsi të aeroportit.
Pronari i një dyqani, mbi të cilin është korridor ajror i aeroplanëve që arrijnë në aeroportin e Syndeyt, ka vendosur të tallet paksa me të gjithë ata që arrijnë në këtë qytet, transmeton Telegrafi.
Brad Hessman ka shkruar me shkronja të mëdha “Mirësevini në Perth” në kulmin e lokalit të tij, në periferi të Sydney – rreth 3.300 kilometra larg qytetit të Perthit.
E për mediat lokale ka thënë se këtë veprim e ka bërë për t’u tallur paksa me njerëzit që arrijnë në aeroportin e Sydneyt. Madje edhe ka pasur sukses.
A “welcome to Perth” sign painted on a building rooftop is scaring passengers landing at Sydney airporthttps://t.co/RXV5WyoWw5 pic.twitter.com/yXB7Dp6DTN
— Sam Bowman (@s8mb) June 14, 2021
Disa prej pasagjerëve kanë shpërndarë fotografi nga aeroplani, që ditëve të kaluara janë shpërndarë në masë të madhe në rrjetet sociale.
“Aeroplanët shpesh kalojnë dhe sa herë që i shoh qeshem me ta”, thotë Hessman.
Por kjo shaka i kushtoi paksa shtrenjtë. Hessman thotë se i ka shpenzuar afro 4.500 dollarë australianë (rreth 2.800 euro) për ngjyrë.
“Bëhet fjalë për një ngjyrë të veçantë me kristale në vete që edhe natën shndrit”, ka shtuar autori i kësaj vepre. /Telegrafi/