Kompania McLaren e ka prezantuar modelin 675 LT në fillim të muajit mars në panairin e kaluar të veturave në Gjenevë, ndërsa tani është njoftuar se seria e kufizuar prej 500 njësive është shitur e tëra.
Të kujtojmë, kjo veturë posedon etiketën 675 LT (Long Tail – në nder të McLaren F1 GTR “Long Tail” i vitit 1997), dhe në krahasim me modelin 650 S posedon rreth 33 për qind të pjesëve të ndryshme.
Sa i përket pjesës motorike, McLaren 675 LT posedon motorin 3.8-litër Twin-Turbo V8 me kapacitet prej 675 kuaj fuqi, i cili është i kombinuar me marshin SSG me shtatë shpejtësi. Në një njoftim thuhet se ky model emeton dyoksid të karbonit rreth 275 gramë në një kilometër.
McLaren 675 LT shpejtësinë prej 0 deri në 100 km/h e arrin vetëm për 2.9 sekonda, deri në 200 km/h e arrin për 7.9 sekonda, ndërsa shpejtësinë maksimale e ka të kufizuar deri në 330 km/h dhe peshon 1.230 kilogramë, transmeton Koha.net.
Gjithashtu duhet të përmendim edhe dimensionet: 4.5 metra i gjatë, rreth dy metra i gjerë dhe 1.2 metra i lartë.
Në fund, duhet të theksojmë se kompania McLaren është duke përgatitur edhe versionin Spider të modelit 675 LT, premiera e të cilit do të mbahet gjatë vitit 2016.
675 LT Spider do të jetë më i shtrenjtë se McLaren 675 LT, ndërsa thuhet se do të ketë edhe të njëjtin motor, 3.8-litra V8 me kapacitet prej 675 kuaj fuqi.