Kontrollet e vazhdueshme të njësive të Doganës për të luftuar kontrabandën dhe veprave të paligjshme në territorin e Republikës së Kosovës kanë rezultuar me gjetjen e mallrave të kontrabanduara tek një subjekt gjatë kontrollit në Ferizaj.
Sipas një njoftimi nga Dogana e Kosovës thuhet se gjatë kontrollit është gjetur sasi e konsiderueshme të produkteve si çajit për dobësim dhe preparateve të tjera stimuluese, të cilat dyshohet se janë kontrabanduar në territorin e Republikës së Kosovës.
“Gjatë kontrollit është zbuluar edhe një armë zjarri, e cila nuk kishte dokumentacion dhe leje të nevojshme për mbajtjen dhe posedimin e saj. Duke qenë kjo një vepër penale, arma menjëherë është dorëzuar te Policia e Kosovës”, thuhet në njoftim.
Po ashtu, bëhet e ditur se mallrat janë sekuestruar nga njësitë anti-kontrabandë të Doganës së Kosovës. “Procedurat e nevojshme janë nisur për të vijuar hetimet në lidhje me ngjarjen dhe subjektin përgjegjës”, thuhet në njoftim. /Telegrafi/