Sot do të mbahet seanca për shtatë kosovarët që u arrestuan gjatë aksionit të Policisë së Kosovës në Lipjan, ku u sekuestruan 400 kilogramë kokainë.
Lajmin e ka konfirmuar për Telegrafin, zëdhënësja e Gjykatës Themelore në Prishtinë, Mirlinda Gashi.
“Po, seanca për shtatë të arrestuarit do të mbahet sot, në orën 10:30”, deklaroi ajo.
Ndryshe, Prokuroria Speciale e Republikës së Kosovës (PSRK), ka bërë kërkesë në Gjykatën Themelore në Prishtinë, për caktimin e paraburgimit të shtatë personave, të cilët janë ndaluar më 17 maj 2021, lidhur me aksionin ku janë sekuestruar 400 kg narkotikë të llojit kokainë.
Zëdhënësi i Prokurorisë Speciale të Kosovës, Ekrem Lutfiu kishte bërë të ditur se prokuroria kërkesën e ka bërë për shkak të dyshimit se të njëjtit kanë kryer veprat penale “Pjesëmarrja dhe organizimi i grupit kriminal të organizuar”, “Posedimi i paautorizuar i narkotikëve, substancave psikotrope ose analoge”, “Mbajta ne pronësi, kontroll ose posedim të paautorizuar të armëve”.
“Prokuroria Speciale kërkesën e ka bërë për shkak të dyshimit se të njëjtit kanë kryer veprat penale ‘Pjesëmarrja dhe organizimi i grupit kriminal të organizuar’ nga neni 277 paragrafi 1 të KPRK-së, lidhur me veprën penale ‘Posedimi i paautorizuar i narkotikëve, substancave psikotrope ose analoge’ nga neni 269 paragrafi 1 lidhur me nenin 275 paragrafi 1 pika 1.1 dhe 1.9 të KPRK-së dhe në drejtim të veprës penale ‘Mbajta ne pronësi, kontroll ose posedim të paautorizuar të armëve;’ nga neni 366 paragrafi 1 i KPRK-së”, ka thënë Lutfiu.
Të hënën, Policia e Kosovës së bashku me policinë e Shqipërisë dhe atë italiane kanë realizuar me sukses një operacion në Lipjan, ku janë sekuestruar 400 kilogramë kokainë, vlera e të cilës arrin në 20 milionë euro. /Telegrafi/