Seanca e Kuvendit të Kosovës, e cila edhe ashtu ka filluar me vonesë, pas ndërprerjes do të vazhdojë në ora 16:30.
Këtë e ka bërë të ditur Zyra për Media e Parlamentit të Kosovës.
“Me kërkesë të iniciuesit, seanca e jashtëzakonshme e Kuvendit shkon në pauzë deri në orën 16:30”, thuhet në këtë njoftim.
Ndryshe, ndonëse me vonesë ka filluar seanca e Kuvendit të Kosovës në të cilën do të votohej për ekipin negociator që do ta përfaqësonte Kosovën në dialogun me Serbinë, ajo u ndërpre për shkak të mospajtimeve.
Në këtë seancë kanë munguar partitë opozitare, LDK, VV dhe PSD.
Shefi i Grupit Parlamentar të Aleancës për Ardhmërinë e Kosovës (AAK), Ahmet Isufi në një prononcim për Telegrafin ka thënë se vazhdimi i seancës së ndërprerë pritet të vazhdoj në orën 16:30.
Isufi ka thënë se ndërprerja e kësaj seance është bërë pasi liderët politik janë në konsultime të vazhdueshme.
“Në orën 16:30 pritet të vazhdoj seanca. Arsyet e kësaj pauze kohore janë ngase liderët politik janë në konsultime”, ka thënë Isufi. /Telegrafi/