Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, ka udhëtuar drejt qytetit të Hagës në Holandë. Gjatë kësaj vizite zyrtare, ndër të tjera, zëvendëskryeministri Bislimi do të ketë bashkëbisedim me deputetët e Komisionit për Çështje Evropiane të Parlamentit të Holandës si dhe vizitë në Këshillin Ekonomik dhe Social (SER).
E lidhur me këtë ka reaguar sot Sindikata e Bashkuar e Arsimit, Shkencës dhe Teknologjisë (SBASHK).
Në reagimin e SBASHK-ut kërkohet nga Bislimi që në Holandë të tregojë se në Kosovë mundon dialogu i mirëfilltë social.
“Zëvendëskryeministër Bislimi çka do t’i thuash Këshillit Ekonomik Social të Holandës? Tregoju të vërtetën se me fajin e Qeverisë sonë mungon dialogu i mirëfilltë social…”, thuhet në reagim.
Lexoni të plotë reagimin e SBASHK-ut?
Nga mediet e nderuara mësuam se ju zëvendëskryeministër Besnik Bislimi jeni në vizitë në Holandë dhe se përveç takimeve të tjera me deputetë e zyrtarë atje do të vizitoni edhe Këshillin Ekonomik Social të këtij shteti. Urojmë që në këtë takim me anëtarët e këtij Këshilli do të merrni mësime se si zhvillohet dialogu social mes sindikatave dhe partnerëve të tjerë social dhe atë përvojë do ta sillni e do të vëni në jetë në Kosovë.
Zëvendëskryeministër Bislimi çka do t’i thuash Këshillit Ekonomik Social të Holandës? Tregoju të vërtetën se me fajin e Qeverisë sonë mungon dialogu i mirëfilltë social.
Ju trego se nga marsi e këndej është dashur të shpallet konkurs për të aplikuar punëdhënësit, pra odat, dhe sindikatat për përbërjen e re të Këshillit Ekonomik Social, por kjo nuk ndodhi me fajin e Ministrisë së Punës dhe Mirëqenies Sociale.
Ky Këshill nuk është funksional dhe nuk ka datë se kur do të bëhet një gjë e tillë. A do t’ju tregoni se, edhe për kundër gjithë atyre angazhimeve të përfaqësuesve të sindikatave në këtë Këshill, tani e sa vite të punësuarit në sektorin privat e publik kanë mbetur pa Marrëveshje të Përgjithshme Kolektive, e cila është bazë e realizimit e të drejtave të punëtorëve.
Drafti i kësaj Marrëveshje është punuar që moti, por Qeveria nuk kishte e nuk ka as sot e gjithë ditën gatishmëri për të nënshkruar atë.
Zëvendëskryeministër Bislimi tregoju mikpritësve në Holandë se Qeveria e Kosovës ka qasje të gabuar ndaj dialogut social dhe ka pasur përpjekje edhe të përzihet në organizimin sindikal e madje edhe të shuaj zërin sindikal dhe se në vend të dialogut të sinqertë ka zgjedhur sulmet verbale dhe ironinë e talljet pa kripë ndaj udhëheqësve legjitim sindikalë.
Zëvendëskryeministër Bislimi çka do t’i thuash Këshillit Ekonomik Social të Holandës për gjithë këto?. /Telegrafi/