Ish-ministri i Mbrojtjes, Pandeli Majko shprehet se organizimi në Tiranë i samitit për Ukrainën është një lëvizje e duhur gjeopolitike e Shqipërisë.
Majko në një deklaratë për Top Channel thotë se Shqipëria ka llogari të hapura me Moskën, e cila në 30 vjet ka mbajtur qëndrime kundër shqiptarëve.
“Nuk mendoj se pyetja do ishte me karakterin e një lloj frike ‘a ja vlen që Shqipëria të ndërmerrte një risk të tillë’. Në rastin konkret nuk mendoj se Shqipëria ka ndërmarrë një risk personal, mendoj se vendimmarrjen e sa për realizimin e këtij samiti e ka bërë së bashku me partnerët strategjikë, por le ti lëmë fjalët e përgjithshme.
Mendoj se samiti në pjesën e tij të padukshme kishte një lëvizje të fortë gjeopolitike të vendit tonë për të krijuar një veçanti nga vendet e tjera anëtarë të NATO-s që janë më afër kufirit me Rusinë për të qenë në krah të Ukrainës.
Ne me Rusinë kemi disa llogari të hapura që e kanë bërë kombin shqiptar më të qartë mbase se sa të tjerët në shumë kuptime, edhe në kuptimin historik. Fakti që rusët kanë mbajtur disa herë qëndrime kundër shqiptarëve në 30 vitet e fundit e bëjnë të kuptueshëm arsyetimin pse Shqipëria mori një rol kaq ekskluziv. Mendoj se është një lëvizje e duhur në kohën e duhur por folur për rriske apo lavdërime. Mendoj se lëvizja e kryeministrit Rama është e goditur, pa dashur të futem në komplimente”, tha ai. /tch/