Ish kryetari i komunës së Skenderajt, Sami Lushtaku, ka ngushëlluar familjarët e personit i cili u gjend pa shenja jete mbrëmjen e së hënën në një veturë të djegur, në Skenderaj.
Lushtaku në një postim të tij në rrjetin social Facebook, ka shkruar se është tragjik lajmi i vdekjes së Ilir Zeqirit nga Kopiliqi i Epërm i Skenderajt.
Ai kërkoi nga organet e rendit që të sqarojnë rrethanat e vdekjes së viktimës.
“Është tragjik lajmi i vdekjes së Ilir Zeqirit nga Kopiliqi i Epërm i Skenderajt. Ai ishte veteran i luftës dhe vëlla i dëshmorit Gazmend Zeqiri. Për shumë vite punoi ndershëm për ta siguruar bukën e gojës për familjen e tij. Pres nga organet e rendit që plotësisht të sqarojnë rrethanat e vdekjes.
Ngushëllimet më të sinqerta nga ana ime për familjen Zeqiri”, ka shkruar Lushtaku në Facebook.
Ndryshe, personi më inicialet I.Z 48 vjeçare, u gjet pa shenja jete mbrëmë në një veturë të djegur në Skenderaj.
Në bazë raportit policorë, në hetimet e para rasti në fjalë u cilësua si vepër penale ‘vrasje rëndë’. /Telegrafi/