Futbollisti ofensiv i Liverpoolit, Sadio Mane, pritet të mungojë rreth gjashtë javë pas një lëndimi në muskujt e pasmë të kofshës.
25-vjeçari u lëndua në ndeshjen e përfaqësueses së Senegalit kundër Cape Verdes të shtunën në kuadër të kualifikimeve për Kampionatin Botëror, ‘Rusia 2018’.
Të martën, klubi anglez ka bërë të ditur se nuk do ta ketë në dispozicion lojtarin për disa ndeshje të rëndësishme.
Sadio Mane has sustained a hamstring injury. Full story: https://t.co/QdynVm9kxp pic.twitter.com/VBs5rYn1rU
— Liverpool FC (@LFC) October 10, 2017
Një prej këtyre sfidave të rëndësishme është ajo kundër Manchester Unitedit që zhvillohet të shtunën në Anfield.
Po ashtu, ai do të mungojë ndaj Tottenham Hotspurit dhe në dy ndeshjet e Ligës së Kampionëve kundër Mariborit.
Lojtari i fazës së sulmit i ka shënuar tre gola në pesë paraqitje në Ligën Premier këtë edicion, prandaj do të jetë një mungesë e madhe për skuadrën e Jurgen Klopp.
Nga ana tjetër, Senegali që është në krye të grupit të vet kualifikues, i ka dy ndeshje vendimtare kundër Afrikës së Jugut më 10 dhe 14 nëntor, ku 25-vjeçari do të mungojë po ashtu.
Mane mungoi në tri ndeshje edhe më herët gjatë këtij sezoni, pasi u përjashtua me karton të kuq në takimin kundër Manchester Cityt. /Telegrafi/