Mesfushori i Chelseat, N’Golo Kante, mund të përballet me një muaj jashtë fushës pasi pësoi një zgjatje muskulore.
Fitues i Kupës së Botës me Francën luajti 84 minuta kundër Tottenhamit të dielën përpara se të largohej me këtë lëndim.
Në mungesë të tij, Blutë pranuan një gol në kohën shtesë nga Harry Kane në një barazim emocionues 2-2 në “Stamford Bridge”.
Sipas Daily Telegraph, Kante pritet të mungojë të paktën tre deri në katër javë për shkak të lëndimit, por më shumë do të dihet pasi të marrë rezultatet e një skanimi.
Tifozët nga Stamford Bridge do të shpresojnë se ai do të kthehet në ndeshjen e tyre me Liverpoolin më 18 shtator.
Duke folur pas ndeshjes së Tottenhamit, trajneri i Chelseat, Thomas Tuchel tha për mesfushorin: “Duket një tjetër lëndim i muskujve. Ai tha se e ndjen shumë të fortë. Pra, asnjë lajm i mirë”.
Humbja e përkohshme e Kantes mund të nxjerrë në pah një çështje më afatgjatë për Blues.
Ai ka qenë një lojtar kyç për klubin që nga nënshkrimi në vitin 2016, duke fituar FA Cup, Ligën Premier, Ligë e Kampionëve dhe Ligën e Evropës në 262 paraqitjet e tij te Chelsea.
Tani 31 vjeç, dhe në vitin e fundit të kontratës së tij, muaji i ardhshëm mund të sigurojë një pasqyrë se sa i rëndësishëm është Kante për klubin dhe sa e vështirë do të ishte për ta zëvendësuar nëse largohet nga klubi.
Lëndimi ka të ngjarë të nënkuptojë më shumë kohë loje për Conor Gallagher, i cili bëri përshtypje si i huazuar në Crystal Palace sezonin e kaluar dhe ka marrë lëvdata nga Thomas Tuchel për ‘shkallën e tij të jashtëzakonshme të punës’.
Gallagher hyri në lojë si zëvendësues për Kante gjatë barazimit me Tottenham të dielën. /Telegrafi/