Sonte (e enjte) mbahet nata e dytë gjysmëfinale e festivalit më të madh evropian të muzikës “Eurovision 2017”.
“Eurovisioni” është krijuar menjëherë pas luftës së dytë botërore, me qëllim që të bashkojë shtetet evropiane duke lënë mënjanë nacionalitetet, përmes muzikës dhe jo gjërave të ashpra, shkruan Telegrafi.
Por, politika nuk ka qenë kurrë larg këtij kompeticioni, sidomos sivjet me mungesën e Rusisë në këtë festival shumë vjeçar.
Në vitin 2004 për herë të parë “Eurovisioni” mbajti gjysmëfinalet dhe që nga atëherë Rusia ka marrë pjesë në të gjitha gjysmëfinalet për çdo vit.
Këtë vit, shteti rus ka dërguar artisten Julia Samoylova me këngën “Flame is Burning”, si të kandiduarën e këtij viti në “Eurovision 2017”, i cili po mbahet në Kiev të Ukrainës.
Mirëpo shërbimi shtetëror i sigurisë së lartë i ka ndaluar Samolyloves hyrjen në shtetin e Ukrainës për tri vite.
Ata thanë se ajo ka shpërfillur ligjin shtetëror të Ukrainës, duke hyrë në shtetin e Krimesë, pjesë kjo të cilën Rusia e aneksoi në vitin 2014.
Kështu, ajo nuk është e lejuar që sonte të këndojë drejtpërsëdrejti si të gjithë konkurrentët e tjerë në “Eurovision”.
Asaj i është propozuar që të marrë pjesë përmes një lidhjeje satelitore duke kënduar live nga një sallë tjetër, mirëpo ende s’është bërë e ditur nëse ka pranuar.
Këtë javë, këngëtarja ruse ishte sërish e pranishme në Krime, për të festuar “Ditën e Fitores”. /Telegrafi/
