Berat Rukiqi, anëtar i kryesisë së Lidhjes Demokratike të Kosovës (LDK), ka kritikuar Qeverinë e Albin Kurtit për dështimin e saj në përfundimin e Urës së Badovcit.
Në një postim në Facebook, Rukiqi ka theksuar se gjatësia e kësaj ure është vetëm 38 metra dhe ka shprehur zhgënjimin që, pas më shumë se 500 ditësh, ura ende nuk është funksionale.
“Në foto është Ura e Badovcit. Pjesa që duhet të punohet për ta bërë urën funksionale ka një gjatësi prej 38 metrave. Tashmë po bëhen mbi 500 ditë që kjo urë nuk është në funksion dhe ende nuk duket as në horizont përfundimi i saj”, ka shkruar Rukiqi.
Ai ka shtuar se ky dështim është një simbol i paaftësisë së kësaj qeverisjeje, duke theksuar se mungesa e progresit dhe e bashkëpunimit në vend janë dëshmi të mëtejshme të kësaj paaftësie. “Një qeveri e paaftë që nuk arrin, për rreth 500 ditë të tëra, të përfundojë një urë prej 38 metrash, nuk e merr askush seriozisht,” ka përfunduar ai.