Zyrtari i Lëvizjes Vetëvendosje Adnan Rrustemi thotë se Presidenti ka bërë shkelje kushtetuese kur ka konstatuar se kjo parti nuk i është përgjigjur atij sa i përket mandatarit.
Rrustemi në RTV Dukagjini ka thënë se sot janë para paralajmërime për rrënimin e sistemit kushtetues në Kosovë.
“Presidenti nuk ka diskrecion për të caktuar mandatarin për kryeministër dhe as nuk mund të merr iniciativë. Ai nuk mund të përcaktojë dikë pos atij që e propozon partia e parë. Qeverinë e mundëson subjekti që ka fituar zgjedhjet e jo Presidenti”, tha ai, përcjell Telegrafi.
Zyrtari i Lëvizjes Vetëvendosje thotë se Presidenti nuk ka të drejtë të mbajë anë në raport me subjektet politike.
Ai ka thënë se Kushtetuta nuk e parasheh formimin e ndonjë qeverie pas kalimit të mocionit të mosbesimit ndaj qeverisë.
Rrustemi thotë se qytetarët janë me të drejt të shqetësuar pasi sipas tij po tentohet të zhbëhet rezultati i zgjedhjeve të 6 Tetorit.
“Ne si Lëvizje Vetëvendosje kemi mjete të mjaftueshme juridike e kushtetuese për ta kundërshtuar këtë përpjekje për ta formuar një qeveri pa zgjedhje”, tha ndër të tjera Adnan Rrustemi./Telegrafi/