Autoritetet në rajonin Utrecht të Holandës, kanë hapur të mërkurën siç thonë ata: “shtegun më të gjatë solar në botë të çiklistëve”, duke lidhur burimin e qëndrueshëm të energjisë me transportin pa ndotje.
Nxënësit e një shkolle fillore për herë të parë kanë vozitur biçikletat në shtegun e gjatë 330 metra, në fshatin Martensdijk në afërsi të Utrechtit, transmeton Telegrafi.
Shtegu përbëhet prej blloqeve të betonit të mbuluara me një shtresë të hollë transparente, që mbron dhe lejon depërtimin e dritës së diellit në qelizat diellore në blloqet e betonit që prodhojnë energji elektrike.
Qëllimi i këtij pilot-projekti është që të konfirmohet se rrugë të tilla me qëllime të shumëfishta mund të përdoren për prodhimin dhe përdorimin e energjisë solare, dhe t’ju shërbejë çiklistëve për vozitje.
“Është shumë e rëndësishme. Duam të jemi neutral sa i përket ndryshimeve klimatike deri më 2040, dhe për këtë duhet të kemi guxim të përdorim inovacione, e ky është një inovacion”, ka thënë Arne Shadele, zyrtar rajonal.
Shtegu solar për çiklistë është hapur në ditën kur Bashkimi Evropian po prezanton projektin e ri, për të përmbushur premtimin se gjatë kësaj dekade do të zvogëlojnë për 55 për qind emetimin e gazrave që nxitin ngrohjen globale.
E një prej personave të parë që e provoi shtegun është 11-vjeçari Machiel van Leuven, që tha se “për një ambient më të mirë”. /Telegrafi/