Tre persona kanë vdekur pas një përplasje të një helikopteri ushtarak në Mendon, New York.
Sipas mediave të huaja, përcjell Telegrafi, helikopteri i evakuimit mjekësor UH-60 ishte në një mision rutinë trajnimi kur u rrëzua.
Siç bëhet e ditur, aksidenti ndodhi rreth orës 6:30 të mërkurën në mbrëmje dhe dëshmitarët raportuan se kishin parë helikopterin duke fluturuar ulët drejt tokës.
Garda Kombëtare e Ushtrisë së Nju Jorkut lëshoi një deklaratë duke thënë: “Një helikopter i evakuimit mjekësor të Gardës Kombëtare të Ushtrisë së Nju Jorkut UH-60 i vendosur në Njësinë e Mbështetjes së Aviacionit të Ushtrisë në Aeroportin Ndërkombëtar të Rochester u përplas më herët sonte në Qytetin e Mendon, New York ndërsa ishte në një mision stërvitje rutinë”.
Sipas raportimeve të para, në bord ishin tre ushtarë të cilët edhe kanë gjetur vdekjen, duke shtuar se kanë filluar hetimet rreth incidentit.
Rreth kësaj ngjarje ka reaguar edhe Guvernatori Andrew Cuomo, përmes një postimi në Twitter.
“Sonte jemi tmerruar nga rrëzimi i një helikopteri të Gardës Kombëtare të Ushtrisë së Nju Jorkut në qytetin Mendon që vrau tre nga më të guximshmit e Nju Jorkut gjatë një misioni trajnimi”, ka shkruar ndër tjerash Cuomo. /Telegrafi/
