Raportet mes SHBA-ve dhe Iranit pas rrëzimit të dronit amerikan, janë përkeqësuar si kurrë më parë.
Komandanti i Gardës Revolucionare të Iranit, Hossein Salam, ka deklaruar se rrëzimi i fluturakes amerikane pa pilot i ka dërguar “porosi të qartë” SHBA-ve, transmeton Telegrafi.
Salami ka shtuar se Irani nuk e ka ndërmend të luftojë me asnjë vend, por pranoi se “është e gatshme për luftë”.
Ndërkohë, Teherani zyrtar pretendon se posedon pamjet e momentit të rrëzimit të dronit amerikan. Sipas iranianëve ai është rrëzuar nga sistemi raketor “Khordad 3”. E droni që është rrëzuar besohet të jetë modeli “Global Hawk”.
Ndërkaq presidenti amerikan Donald Trump, sot ka thënë se rrëzimi i dronit amerikan nga ana e Iranit, ka qenë një “gabim shumë i madh“.
Në anën tjetër Washingtoni pretendon se rrëzimi i dronit ka ndodhur në hapësirën ndërkombëtare ajrore, derisa Teherani insiston se ka ndodhur brenda territorit të Iranit.
Televizioni shtetëror iranian Press TV, pretendon se videoja e publikuar e rrëzimit të dronit është e vërtetë, e në anën tjetër deri më tani nuk ka ndonjë konfirmim për autenticitetin e videos. /Telegrafi/
