Inspektorët e Komunës së Shtimes këtë të premte kanë rrënuar tri furra të gëlqeres, dy furra në fshatin Dugë dhe një në fshatin Karaçicë.
Nga ora 10:00 njësitet e policisë të stacionit në Shtime, të mbështetura edhe nga Njësia e Reagimit të Shpejtë (NJRSH) kanë bërë asistimin e inspektorëve komunalë në këtë aksion.
Policia njofton se rrënimi i këtyre furrave është bërë për të parandaluar ndotjen e ambientit dhe mjedisit në rajonin e Shtimes.
“Policia e stacionit në Shtime i kishte ndërmarrë veprimet e nevojshme dhe ka zhvilluar procedura hetimore në koordinim me inspektorët e komunës së Shtimes edhe të Ministrisë së Ambientit dhe Planifikimit Hapësinor, me qëllim parandalimin e kësaj dukurie dhe ndëshkimin e personave, me qellim të ruajtjes nga ndotja të ambientit dhe mjedisit në këtë rajon”, thuhet në komunikatën për media.
“Në lidhje me këtë Drejtoria e Shërbimeve Publike, Inspektorët Komunal të komunës së Shtimes kanë iniciuar procedurë për rrënimin e tyre dhe sot, datë 22.09.2023 nga ora 10:00 njësitet e policisë të stacionit në Shtime, të mbështetura edhe nga Njësia e Reagimit të Shpejtë (NJRSH) kanë bërë asistimin e Inspektorëve të komunës së Shtimes dhe janë rrënuar tri furra të gëlqeres, dy furra në fshatin Dugë dhe një në fshatin Karaçicë”.
I gjithë procesi i rrënimit të furrave të gëlqeres bëhet e ditur se ka kaluar pa ndonjë incident. /Telegrafi/
