Policia e Kosovës, përkatësisht Drejtoria Rajonale në Pejë ka bërë të ditur se sot në mëngjes është informuar në lidhje me një video incizim i cili u është prezantuar nga një qytetar.
Në këtë video incizim, siç thuhet në njoftim, përcjell Telegrafi, vërehej një qytetar duke e goditur (në mënyre brutale) një fëmijë të komunitetit Ashkali Kosovar.
Me këtë rast, siç bëhet e ditur tutje, Policia e Kosovës pas shikimit të video incizimit, ka ndërmarrë masa të menjëhershme për arrestimin e të dyshuarit.
Policia e Kosovës thekson se bëhet fjalë për një rast të ndodhur me datën 14.08.2019 në ora 14:00, në Gurrakoc-Istog.
“Pas një pune intensive operativo-hetimore, sot me datën 19.08.2019 rreth orës 09:23 Policia e Kosovës-Stacioni Policor Istog ka arrestuar të dyshuarin: L.D lindur me 1990 m/k/sh. Pas intervistimit nga ana e hetueseve Policor, është informuar prokurori i shtetit dhe me urdhër të tij, i dyshuari ndalohet për 48 orë”, thuhet në njoftimin e Policisë.
Gjithashtu, bëhet e ditur se viktima femër e mitur ishte dërguar për trajtim mjekësor, me ç’rast gjendja e saj sipas mjekut pas trajtimit, ishte stabile.
“Zyrtarët policorë janë duke qëndruar në kontakt me familjarët e viktimës për t’i përkrahur për çfarëdo nevoje që mund të kenë”, thuhet në fund të njoftimit të Policisë së Kosovës. /Telegrafi/