Cristiano Ronaldo ishte i kënaqur me mënyrën se si Juventusi vazhdoi të fitonte, pasi mposhti 2-1 Genoan të mërkurën.
Të dy skuadrat përfunduan ndeshjen me nga 10 lojtarë dhe dukej sikur ata do të ndanin pikët pas golave të Leonardo Bonuccit dhe Christian Kouame në Torino.
Megjithatë, në minutat shtesë të ndeshjes, gjyqtari vendosi të akordoj një penallti për Bianconerët, e cila u konvertua në gol nga Ronaldo.
Ky gol i Juventusit ishte shumë i diskutueshëm nga mediat dhe spektri futbolldashës, por jo edhe për Ronaldon, i cili ndihet i lumtur me fitoren.
“Jam shumë i lumtur”, ka thënë fillimisht Ronaldo për Sky Sport Italia.
“Ishte një ndeshje shumë e vështirë kundër një ekipi të organizuar, por ne jemi Juventus, motoja është që të luftojmë deri në fund”.
“Jemi shumë të lumtur me tre pikët. Ne krijuam shumë dhe e merituam atë”.
“Interi përpara në renditjen ishte një stimul shtesë”, përfundoi ylli portugez. /Telegrafi/