Conor McGregor tash është kampion i peshave të lehta dhe më të lehta të UFC, duke u bërë personi i parë që arrin diçka të tillë. Kjo ndodhi pasi ‘The Notorious’ nokautoi Eddie Alvarezin në duelin e New Yorkut.
Pas këtij meç të UFC që tërhoqi vëmendje të madhe mediatike, kanë filluar spekulimet se çfarë do të ndodhë në të ardhmen me irlandezin e fuqishëm. Në muajin maj, ai pritet të bëhet baba për të parën herë, ndërsa pritet të përparojë edhe në biznes, pasi WME-IMG duhet t’ia japë një pjesë të aksioneve.
Pasi të përfundojnë këto, 28-vjeçari pritet t’i kthehet ‘tetëkëndëshit’, megjithëse lista e kundërshtarëve që e presin është shumë e gjatë. Por, dy nga rivalët më të mundshëm janë Khabib Nurmagomedov dhe Tyron Woodley.
McGregor ka pasur përplasje verbale me të dy para matjeve zyrtare të premten, teksa rusi pas fitores ndaj Michael Johnson e quajti frikacak atë dhe gjithë Irlandën dhe i kërkoi publikisht duel.
Mirëpo, irlandezi nuk ngutet para se ta marrë vendimin nëse do të luftojë me myslimanin nga Dagestani.
Ai ka thënë se Nurmagomedov është përleshur shumë rrallë dhe nuk është i përkushtuar ndaj këtij sporti, prandaj nuk e konsideron të nivelit të tij, megjithëse e ka lëvduar për fitoren e të shtunës mbrëma.
“Më duhet ta shoh aktiv. Më duhet të shoh aktivitet. Më duhet të shoh qëndrueshmëri. Më duhet ta shoh dikë si veten. Nëse dëshiron që unë të vij të ta ndryshoj jetën, nëse do që të të zgjedh ty, atëherë duhet të më japësh arsye ta bëj këtë”, është shprehur McGregor. /Telegrafi/
