Artistja shqiptare me renome botërore, Rita Ora, po vazhdon të jetë shumë e angazhuar në muzikë.
Ajo është në prag të publikimit të albumit të saj më të ri “You & I”, i cili do të publikohet i plotë më 14 korrik, gjersa ka bërë të ditur se këtë premte po sjell këngën e saj të re “Don’t Think Twice”.
Ndërkohë, ajo anash nuk po i lë as koncertet e paraqitjet publike.
Së fundmi, përmes një videoje të publikuar në rrjetin social Instagram, Ora ka njoftuar fansat e saj se do të performojë këtë fundjavë në Paradën e Krenarisë në Londër.
“Befasi: Unë do të perfrmojë në Paradën e Krenarisë në Londër këtë vikend. Jam shumë e entuziazmuar! Do të jetë shumë argëtuese dhe mezi pres të vijë dhe të mbështes komunitetin LGBT+”, shkroi 33-vjeçarja në Instagram.
Rita përndryshe ka publikuar deri më tani dy nga këngët e albumit, “You Only Love Me” dhe “Praising You” (bashkëpunim me FatBoy Slim), të cilat janë pritur mirë nga publiku. /Telegrafi/
