Vetëm 16 ditë na ndajnë nga përfundimi i vitit 2018, vit ky që për skenën muzikore shqiptare ishte shumë i pasur me këngë të reja. Njëra nga artistët që ishin më aktiv këtë vit është padyshim këngëtarja, Dafina Zeqiri.
Artistja vitin 2018 e filloi me pjesëmarrjen në klipin e rep-artistit të njohur botëror, French Montana, shkruan rtv21. “Famous” titullohet kënga që ishte lansuar në muajin janar të vitit 2018 e që protagoniste kryesore e këtij klipi ishte artistja shqiptare, Dafina Zeqiri.
Dafina muajt e parë të vitit 2018 i kaloi në Amerikë ku jetoi dhe përgatiti këngë të reja, shkruan rtv21.tv Pas “Famous” artistja lansoi disa fotografi profesionale të realizuara nga një fotografe shqiptare, për të vazhduar kështu duke dhënë edhe disa intervista për revista të huaja ndërkombëtare.
Qershori ishte muaji kur Dafina u rikthye në skenën muzikore shqiptare me këngën “Fuego”, videoklipi i të cilës ishte realizuar jashtë Kosovës. Pas lansimit të kësaj kënge artistja vazhdoi koncertet brenda dhe jashtë Kosovës. Kënga e dytë e Dafinës për vitin 2018 erdhi në muajin gusht, e cila ishte në bashkëpunim me reperin e njohur, Lumi B. Kënga mbante emrin “Kalon” dhe u bë njëri nga hitet e padiskutueshme e sezonit të verës.
Rikthimi i Dafinës në skenën muzikore u vu në pah fuqishëm kur artistja paralajmëroi që projekte të tjera do të lansohen gjatë muajve në vijim. Në muajin tetor artistja publikoi dy këngë “Kurgjo Nuk Kallojna” që ishte solo dhe “A don Love?” që ishte në bashkëpunim me reperin, Noziy.
Ani pse të dy këngët u lansuan vetëm në pesë ditë diferencë që të dyja arritën të pëlqehen nga publiku.
Suksesin e këtyre këngëve artistja e festoi duke publikuar edhe disa fotografi profesionale të realizuara në vende të ndryshme, në të cilat shfaqte në pah linjat e saj trupore. Me një fotosesion të veçantë artistja erdhi për festën e 28 Nëntorit, ku shfaqej me helmetën e Skënderbeut në kokë.
Në po të njëjtën datë Dafina festoi edhe ditëlindjen e nënës së saj, Melihates, e cila kishte qenë gjithashtu këngëtare më herët. Dafina e befasoi nënën dhe motrën e saj me një udhëtim të veçantë në ishujt Maldive.
Këngëtarja nga Maldivet tregoi që viti 2018 ende nuk ka përfunduar, kështu duke paralajmëruar lansimin e projekteve të reja. Dafina nuk ka dhënë detaje shumë rreth këtyre projekteve andaj mbetet të shihet se çfarë befasie ka përgatitur ajo për fansat.
Viti 2018 mund të themi që ishte i suksesshëm për këngëtaren dhe presim që ajo të mos ndalojë së publikuari projekte të reja muzikore edhe në vitin në vijim.
