Ashtu siç edhe kishte paralajmëruar, artistja shqiptare me renome botërore, Dua Lipa, ka publikuar këngën e saj më të re.
Pas një pritje thuajse 11 mujore në mungesë prurjesh të projekteve të reja muzikore, këngëtarja shqiptaro-angleze ka shënuar rikthimin me këtë këngë të re.
“Don’t start now” titullohet kënga e saj e re, e cila është super ritmike, dhe është vizualizuar edhe me klip.
Dua vjen mjaft provokuese në klip, teksa shfaq linjat atraktive dhe pamjen e saj të re prej biondeje.
“Don’t start now” është pjesë e albumit të saj të dytë, që do të publikohet i plotë së shpejti.
Vet këngëtarja 24-vjeçare është shprehur se albumi i saj i ri është një “epokë e re” në karrierën e saj, në aspektin e ndryshimit të rrymave muzikore dhe lundrimin në një zhanër të ri.
Sukseset për artisten shqiptare kanë qenë të shumta këtë vit, marrë parasysh faktin që ajo u bë imazhi kryesor i “YSL Beauty”, dhe interpretuesja e kolonës zanore të filmit shumë të suksesshëm, “Alita: Battle Angel”. /Telegrafi/
