Kanceri i gjirit është kanceri më i shpeshtë te gratë në mbarë botën. Edhe kur tejkalohet sëmundja, gratë e përjetojnë keq edhe një periudhë tjetër, e cila është jetesa me një gji.
Por kohëve të fundit, Kirurgjia Plastike ka hapur dyert për të gjitha gratë që e kanë kaluar këtë sëmundje dhe të cilat duan të bëjnë rindërtimin e gjirit të tyre.
Drejtoresha e Klinikës Kirurgjike, Violeta Zatriqi ka thënë në emisionin Radar në RTV Dukagjini se kjo iniciativë ka filluar pak muaj më parë, dhe se ky intervenim kryhet falas në QKUK.
“Ne si staf i Klinikës Kirurgjike kemi marr iniciativën në muajin tetor i cili edhe është muaji i ndërgjegjësimit të kancerit. Kemi dashur sensibilizimin e grave në gjithë Kosovën, që e kanë kaluar këtë sëmundje, të vijnë dhe të na takojnë në QKUK. Ne kemi arritur të marrim vëmendjen e tyre dhe të kthejmë buzëqeshjen e shumë grave. Ne kemi filluar me operacionet e para në muajin dhjetor me donacione nga jashtë dhe aktin e fundit e kemi përfunduar javën e kaluar”, tha ajo.
Atëherë kur lista veçse ka filluar të rritet, kirurgu plastik Korab Berisha tha se është rritur edhe nevoja për donacione për blerjen e implanteve, pa të cilat është e pamundur të kryhen këto operacione.
“Këto implante janë jashtëzakonisht të rëndësishme për kryerjen e këtyre operacioneve. E dimë që kostoja e tyre është e lartë, por janë të nevojshme. Të gjithë ata që kanë dëshirë të ndihmojnë në blerjen e tyre mund të vijnë në klinikë dhe të ndihmoj këto gra, të cilat po presin që të hyjnë në operacion”, tha ajo.
Kirurgu Ylber Zejnullahu ka thënë se për të gjithë gratë që frikësohen t’i nënshtrohen këtij operacioni, është e nevojshme të dinë se çdo gjë shkon me faza. Ato i nënshtrohen pyetjeve të shumta por edhe kontrolleve para operimit.
“Lista është e gjatë, 100 veta kanë ardhur, e 60 I kemi në listën e ngushtë. Por së pari ata do t’i nënshtrohen pyetjeve se cilat kanë të drejtë që t’i nënshtrohen operacionit dhe nuk rezulton ndonjë problem. Ne sigurohemi që s’ka komplikacion të sëmundjes, e më pastaj fillojmë me rikonstruktim”, tha ai. /Telegrafi/
