Reshjet e borës të pasuara nga ulja e ndjeshme e temperaturave dhe ngricat mund të krijojnë probleme të ndryshme dhe vështirësi në transportin rrugor në Shqipëri.
Sipas Institutit të Gjeo-shkencave bëhet e ditur këto reshje do të vijojnë edhe të dielën në zonat verilindore, lindore dhe juglindore të Shqipërisë.
Tutje në njoftimin e Institutit bëhet e ditur se sot priten reshje mesatare në qarqet Tiranë, Elbasan, Fier, Berat, Korçë, Vlorë dhe Gjirokastër të shoqëruara me shtrëngata.
“Në qarqet Lezhë dhe Durrës priten reshje lokalisht mesatare, ndërsa në pjesën tjetër të qarqeve priten reshje të dobëta”, thuhet në njoftim.
Gjithashtu, sipas kësaj faqe shtrëngatat dhe intensiteti i lartë i reshjeve për momente të shkurtra mund të krijojnë probleme të ndryshme si dhe vërshime të ujit në zonat urbane në varësi të sistemit të kanalizimeve në qarqet Tiranë, Elbasan, Fier, Berat, Korçë, Vlorë dhe Gjirokastër.
“Reshjet do të sjellin rritje të prurjeve në lumenjtë Ishëm dhe Shkumbin. Në veri, lindje dhe juglindje në lartësitë mbi 300 m nga niveli i detit reshjet do të jenë në formë bore.
Nesër (e diel, dt.21) në juglindje reshjet priten të jenë në formën e borës, ndërsa në pjesën tjetër të territorit nuk priten reshje (siç tregohet në tabelë, respektivisht për secilin qark)”, bëhet e ditur në faqen zyrtare të Institutit.
Ndërkaq, temperaturat minimale dhe maksimale për të dielën pritet të arrijnë: në bregdet: 5 deri në 13 gradë Celsius, në vendet e ulëta: 3 deri në 12 gradë Celsius, në vendet malore: -4 deri në 2 gradë Celsius.
“Sot pasdite (e shtunë, dt.20) dhe nesër (e diel, dt.21) era pritet të fryjë mesatare deri e fortë, kryesisht në bregdet dhe zonat malore në veri”, thuhet ndër të tjera në postimin e Institutit të Gjeo-shkencave në Facebook. /Telegrafi/
