Seleksionuesi i Përfaqësueses së Portugalisë, Fernando Santos, rrezikoi kur vendosi që mesfushori 18-vjeçar, Renato Sanches, të jetë titullar në ndeshjen çerekfinale kundër Polonisë, të enjten mbrëma.
Por, Sanches jo vetëm që i dha rrjedhshmëri lojës së Portugalisë në mesfushë, por edhe shpërbleu trajnerin Santos për vendimin e tij me gol të shënuar.
Për Sanchesin, i cili debutoi në muajin tetor të vitit të shkuar, kjo ishte paraqitja e parë si titullar te Portugalia. Ai kundër Polonisë tregoi lojë fantastike.
Vrapoi gjatë tërë ndeshjes dhe shënoi golin e barazimit për Portugalinë në minutën e 33-të (1:1) si dhe nga pika e bardhë gjatë serisë së penalltive, pasi koha e rregullt dhe shtesat nuk dhanë fitues.
Në fund, Portugalia u kualifikua në gjysmëfinale pas fitores 5:3 në penallti. Krahas lojës së mirë, Sanches theu edhe dy rekorde në këtë ndeshje. U bë futbollisti më i ri që startoi një ndeshje për Portugalinë në një turne të madh dhe u bë golashënuesi më i ri në fazën e nokautit të kampionateve evropiane.
Pa dyshim se me performancat e treguara, Renato ia ka kthyer borxhin trajnerit të Portugalisë për besimin e dhënë.
Por, që të hyjë në histori dhe të legjendarizohet bashk me Ronaldon, ai ka edhe dy ndeshje të cilat duhet t’i fitojë dhe ta tregojë veten.