RB Leipzigu ka arritur t’ia shkaktojë humbjen e parë Real Madridit (3-2) në fazën grupore të Ligës së Kampionëve.
Josko Gvardiol shfrytëzoi një top të kthyer për ta zhbllokuar rezultatin me një gol me kokë (13’).
Nuk vonoi shumë dhe vendasit e shënuan edhe golin e dytë, realizues ishte Christopher Nkunku (18’).
Para se skuadrat të shkonin në pushim, Vinicius Junior e ngushtoi rezultatin pas një harkimi preciz nga Marco Asensio (44’).
Në gjysmën e dytë, vendasit e shënuan edhe golin e tretë përmes Timo Werner (81’), i cili u asistua nga Mohamed Simakan.
Një tjetër gol për Los Blancos e realizoi Rodrygo në minutat shtesë (90’+4) duke u treguar i saktë nga pika e bardhë.
Real Madridi i kualifikuar është lider i Grupit F me dhjetë pikë, ndërsa RB Leipzigu ka një pikë më pak dhe me barazim ndaj Shakhtar Donetskut në raundin e fundit do të kualifikohet tutje. /Telegrafi/