Politikanët tanë kanë reaguar nëpër llogaritë e tyre në rrjetet sociale pas ndeshjes që Kosova e humbi 5-3 ndaj Anglisë në kuadër të kualifikimeve për Euro 2020.
Pas ndeshjes së Përfaqësueses tonë kundër asaj të ‘Tre Luanëve’, ka reaguar edhe kryeministri në detyrë, Ramush Haradinaj.
“Këta jeni ju, luftëtarë të lindur. Ju, që fëmijërinë e jetuar në kohë të pakohë, e shndërruat në histori për vendin! Faleminderit për emocionet e dhuruara sot dhe gjithmonë. Faleminderit për prezantimin dinjitoz të vendit dhe vlerave tona!”, ka shkruar në fund Kryeministri në detyrë.
Për përballjen e ‘Dardanëve’ ka reaguar edhe Presidenti Hashim Thaçi, duke thënë se edhe më të mirët humbin.
“Edhe më të mirët humbin ndonjëherë. Djemtë tanë luajtën shumë mirë dhe asnjëherë nuk u dorëzuan. Në humbje dhe fitore, përherë jemi në përkrahje të tyre! HTH”, ka shkruar Presidenti i Kosovës.
Edhe Kadri Veseli ka reaguar në lidhje me paraqitjen e Kosovës, duke e vlerësuar lartë paraqitjen e djelmoshave tanë.
“Duartrokitje të forta për djemtë e Kosovës dhe gjithmonë në përkrahje të Kombëtares sonë!”, ka shkruar në ‘Facebook’ kryetari i PDK-së.
Kryetari i Nismës Social Demokrate, Fatmir Limaj po ashtu ka reaguar për ndeshjen e Kosovës ndaj Anglisë, derisa tha se e mbrojtën flamurin me dinjitet.
“Gjithmonë me ty Kosovë si në humbje, si në fitore. Faleminderit djema që nuk u dorëzuat për asnjë moment përballë një kundershtari të fortë siç është Anglia. E mbrojtët me plot dinjitet flamurin e Kosovës. Kokën lart. Pavarësisht rezultatit, i bindur në kualifikimin në Europian. Përpara KOSOVË!”, ka shkruar Limaj në llogarinë e tij në ‘Facebook’.
Pas kësaj humbje që është e para për Kosovën, kalojmë në pozitën e tretë me tetë pikë, ndërsa Anglia ka 12 pikë. /Telegrafi/
