Kryetari i Komunës së Deçanit, Bashkim Ramosaj, ka thënë se kompania rajonale e ujësjellësit “Hidrodrini” nuk do ta ketë më në menaxhim Deçanin.
Ramosaj këtë deklaratë e bëri gjatë një konference për media, transmeton Telegrafi.
“Hapat ligjore janë të përcaktuar sepse janë rekomandime të një instituti kredibil të Kosovës. Do flasë vetëm për hapat politikë dhe administrativë që po ndiqen, kompania rajonale ‘Hidrodrini’ nuk do ta ketë më Deçanin me vete në menaxhim. Kompania do jetë kompani komunale që do ketë adresim dhe do ketë në dispozicion taksat e qytetarëve të Deçanit që kjo kompani të jetë me standard më të lartë, që kjo kompani t’i përmbushë kriteret e standardet që t’i gjendet afër qytetarëve”, pohoi Ramosaj.
Ramosaj ka njoftuar se deri tani 1392 persona kanë kërkuar ndihmë në QKMF-në e Deçanit deri tani.
Kryetari i Deçanit deklaroi se tashmë IKSHPK ka konstatuar se në ujë ka pasur disa bakterie.
Ndryshe, IKSHPK njoftoi sot se pas analizave të kryera janë identifikuar disa baktere që mund të japin indikacion për kontaminim të ujit të pijshëm.
Në komunikatën e IKSHPK, thuhej se “në mostrat e ujit të marra me datën 12. 07. 2021 nga rajoni i Deçanit, pas kultivimit në terrene ushqyese përmes teknikës së identifikimit me MALDI-ToF në laboratorët e IKShPK Prishtinë, janë identifikuar disa baktere që mund të japin indikacion për kontaminim të ujit të pijshëm”. /Telegrafi/
