Kryeministri i Shqipërisë, Edi Rama, nga Podgorica të premten ka folur edhe për takimin që ka zhvilluar një ditë më parë me kryeparlamentarin e Kosovës, Glauk Konjufca.
Ky i fundit pas takimit i pyetur nga mediat për propozimin e Ramës për Asociacionin, ka thënë se elemente të tij përmbajnë autonomi territoriale për serbët në Kosovë.
Mirëpo, këtë deklarim Rama e ka hedhur poshtë duke thënë se me Konjufcën nuk kanë biseduar aspak për draftin e propozuar nga ana e tij për Asociacionin e komunave me shumicë serbe në Kosovë.
Sipas tij, kryeparlamentari i Kosovës nuk e ka parë draftin, por “e di se cfarë duhet të thotë para kamerave pasi është konsultuar me Albinin”.
“Unë me Glaukun kemi pasur një bisedë fantastike miqësore e vëllazërore. Unë flisja dhe Glauku qeshte. Nuk kemi folur asnjë fjalë për draftin e Asociacionit. Por, pse i tha Glauku ato jashtë duhet të pyesni Albinin që nuk ishte në takim. Glauk s’di fare se çfarë është drafti, por di se çfarë duhet të thotë para kamerave pasi është konsultuar me Albinin”, është shprehur Rama.
Ai tutje në mënyrë ironike ka thënë se “kështu funksionon demokracia në Qeverinë e Kosovës dhe unë e respektoj, është vendi më demokratik në Ballkan siç thotë Albini”. /Telegrafi/