Policia britanike në Derbyshire ka publikuar pamjet e kamerave të sigurisë, që shfaqin momentin kur asokohe 16-vjeçari godet 82-vjeçarin me boks në fytyrë, i cili nga lëndimet ka humbur jetën.
Incidenti kishte ndodhur më 6 maj të vitit 2021, në Derbyshire të Britanisë së Madhe, transmeton Telegrafi.
Nga salla e gjyqit është bërë e ditur se 82-vjeçari Dennis Clarke, ishte ndalur për të biseduar me disa të rinj për shkak të sjelljeve të tyre të pahijshme, që edhe u filmuan nga kamerat e sigurisë duke u “sorollatur” në shkallët elektrike.
Pamjet shfaqin Clarkun që ndiqet nga të rinjtë që i shkojnë pas sikur të ishin “hije”. Pasi e ndalën për të qëruar hesapet, atë e sulmoi Omar Moumeche që e goditi me boks në fytyrë.
Nga goditja e fuqishme Clarke rrëzohet në tokë, pa vetëdije. E pavarësisht se u dërgua në spital për trajtim, disa ditë më vonë ka ndërruar jetë nga lëndimet e marra.
Moumeche, tani 18-vjeç, është shpallur fajtor për sulm fizik. Ai është dënuar me dy vite qëndrim në qendrën e ndalimit për të rinjtë. /Telegrafi/
