Qeveria nuk ka marrë një miratim nga institucionet e Bashkimit Europian dhe njësia e Këshillit të Europës kundër pastrimit të parave Moneyval për projektligjin “Për Amnistinë Fiskale”.
Ministrja e Financave Delina Ibrahimaj tha se drafti u është prezantuar institucioneve ndërkombëtare por është ende në fazë diskutimi.
“Jemi ende në fazë diskutimi. Nuk ka një miratim nga këto institucione, por jemi duke u konsultuar me to”, tha Ibrahimaj.
Financat nuk e kanë ende një vlerësim se sa do të jetë pasuria që pritet të formalizohet nga nisma e amnistisë fiskale, por një studim po bëhet në bashkëpunim me bankën qendrore duke marrë si indikatorë paranë jashtë bankave.
“Nuk ka një faturë ende, por po e vlerësojmë bashkë me Bankën e Shqipërisë duke marrë në konsideratë vlerën e parave jashtë bankave në ekonomi”, theksoi ministrja.
Në fund të majit, paraja në qarkullim jashtë kanale zyrtare kapi vlerën e 3 miliardë eurove duke u rritur me 130 milionë euro krahasuar me një vit më parë.
Përveç draftit të amnistisë, financat po punojnë për rishikimin e buxhetit të këtij viti dhe në fokus të tij do të jetë zgjatja e paketës së rezistencës për shtresat në nevojë, të cilët marrin mbështetje financiare prej 3 mijë lekë të reja në muaj për përballimin e rritjes së çmimeve. /Euronews Albania/