Mesfushori Qëndrim Zyba do ta vazhdojë karrierën në klubin e qytetit të tij, te Ballkani, ku ka nënshkruar kontratë trevjeçare.
Lajmi është konfirmuar përmes një postimi në faqen zyrtare të kampionit të Kosovës.
“…e ku ka me mirë se në vendlindje”, shkruan në njoftimin e Ballkanit duke iu referuar Suharekës, qytetit të lindjes së 21-vjeçarit.
“Qëndrim Zyba nënshkruan kontrate trevjeçare me klubin e qytetit. Ne jemi kampion”, thuhet tutje.
Zyba që ka qenë edhe pjesë e ekipit të të rinjve të Prishtinës, është edhe pjesë e skuadrës së Kosovës U-21.
“Të dashur miq, desha t’ju njoftoj që nga sot nuk do të jem më pjesë e FC Prishtinës. Falënderoj të gjithë ata që më qëndruan pranë gjatë këtij rrugëtimi”.
“Falënderoj kryesinë, trajnerët, lojtarët si dhe të gjithë stafin. Gjithashtu, falënderoj tifozët Plisat për përkrahjen e dhënë gjatë këtyre viteve”.
“Jam i lumtur që ndava pesë vite me ju duke mbrojtur ngjyrat bardh e kaltër dhe duke fituar gjitha trofetë me klubin bardhekalter. Mirupafshim Prishtinë. Me respekt, Qendrim Zyba”, ka shkruar futbollisti në Facebook. /Telegrafi/
