Rinor Qehaja nga Instituti Edguard ka thënë se Projektligji i Pagave ka bërë padrejtësi në kategorizimin e pagave për profesionet e ndryshme.
Qehaja, në emisionin “Përballje” me gazetarin Muhamet Hajrullahu në RTV Dukagjini, ka thënë se një padrejtësi është bërë edhe brenda vet sistemit të arsimit, ku paga e një mësimdhënësi në shkollat e mesme dallon shumë nga ato të një mësuesi para fillor.
“Një mësimdhënës në shkollë të mesme ka koeficient 2.15, ndërsa mësimdhënësi në institucionet parashkollore ka koeficient 1.80. Pra, përkundër që mësimdhënësi i institucioneve parashkollore ka një punë me grup mosha shumë më të ndjeshme, ai është i dëmtuar me një koeficient shumë më të vogël”, tha ai, përcjell Telegrafi.
Drejtori i “Edguard” ka thënë se është e padrejtë të bëhet krahasimi mes koeficienteve të arsimtarëve dhe mjekëve.
“Mësimdhënësi mban orë mësimore maksimumi dy deri në katër orë në ditë, ndërsa një mjek ka një operacion super të ndërlikuar që zgjatë gjashtë orë në ditë”.
Qehaja ka thënë se dihet fundi i kësaj greve, për shkak të përfitimit të poenëve politikë.
“Dihet fundi i kësaj greve. Ndërprerja e saj dhe plotësimi i kushteve të grevistëve. Kjo edhe për shkak të përfitimit të poenëve politikë”, tha Qehaja./Telegrafi/