Që nga dita e premte në Gjakovë po vazhdojnë kërkimet për gruan që është hedhur nga ura e Fshajt.
Forca e Sigurisë së Kosovës, në njoftimin e bërë për media ka njoftuar se po vazhdojnë kërkimet për 59 vjeçaren e zhdukur, transmeton Telegrafi.
“Ekipet e Kërkim Shpëtimit në ujëra të Gardës Kombëtare të Forcës së Sigurisë së Kosovës, së bashku me Policinë e Kosovës dhe autoritet lokale të komunës së Gjakovës, dhe me kërkesën për angazhim të Qendrës së Situatave të Qeverisë së Republikës së Kosovës, janë duke realizuar operacionin e Kërkim Shpëtimit të personit të zhdukur me inicialet A.M i moshës 59 vjeçare, zhdukur që nga data 16.06.2023”, thuhet në njoftim.
FSK sqaron se, operacioni i kërkim shpëtimit ka filluar para katër ditësh nga ura e Fshajt ku është parë personi në fjalë para incidentit dhe është duke vazhduar deri në gjetjen dhe dorëzimin tek autoritetet kompetente.
Ndryshe, në njoftimin që kishte bërë Policia ditën e premte thuhej se, një femër e moshës madhore ka rënë nga ura e Fshajt në lumin Drini i Bardhë dhe se të gjitha njësitet e nevojshme policore dhe zjarrfikësit menjëherë kanë dalë në vendin e ngjarjes si dhe është njoftuar Njësia për Kërkim Shpëtim. /Telegrafi/
