Kalimi i mesfushorit Kamer Qaka nga skuadra e Poli Iasit tek ekipi i Steauas së Bukureshit ishte një nga lëvizjet më të bujshme në kampionatin rumun të futbollit.
Shqiptari bëri mjaft mirë me ish-ekipin e tij dhe ishte në qendër të afatit kalimtar.
Ai kërkohej nga të gjithë klubet e mëdha të kampionatit rumun, por dhe jashtë këtij shteti.
Steaua u tregua më e shkathët, pasi pagoi 360 mijë euro për 23-vjeçarin dhe e afroi në skuadër.
Shqiptari nuk po gjen veten tek ekipi i ri, pasi nuk po arrin të përshtatet dhe moduli i lojës nuk i shkon përshtat. 4 ndeshje për të, 2 si titullar dhe asnjë shenjë, 169 minuta në total.
Trajneri i Steauas nuk është i kënaqur dhe vështirë që lojtari të gjejë shumë hapësira nëse nuk ndryshon “marsh”. Kur na ndajnë pak ditë nga përfundimi i afatit kalimtar, një ide e re ka lindur në Rumani.
Presidenti i Poli Lasit, Adrian Ambrosie, foli hapur se dëshiron të kthejë në ekip mesfushorin Kamer Qaka, shkruan telesport.
“Do të mundohemi të sjellim një qendërmbrojtës në këtë periudhë dhe gjithashtu jemi të interesuar për të huazuar Qakën për 1 vit. Do të ishte shumë më mirë që të vinte të luante se sa të qëndronte si rezervë”, përfundoi numri një i ish-klubit të Qakës.