Presidenti rus Vladimir Putin ka thënë se nëse vendet perëndimore si SHBA-ja duan të hyjnë në luftë me Rusinë, do të ishte “krejt ndryshe” nga ajo që Moska e quan një “operacion ushtarak special” në Ukrainë.
Putin bëri vlerësime për luftën Rusi-Ukrainë dhe marrëdhëniet Rusi-Kinë në një intervistë për transmetuesin shtetëror rus Rossiya, shkruan TrtWorld, përcjell Telegrafi.
Duke folur për kundërsulmin e Ukrainës, Putin tha se “ka dështuar plotësisht”.
Putin adresoi gjithashtu pretendimin se Rusia dhe Kina po formojnë një bllok të ri ushtarak, duke vënë në dukje se Perëndimi vazhdimisht krijon aleanca.
Ndërkohë kryediplomati rus Sergei Lavrov ka mbërritur në Pekin përpara një vizite të pritshme të presidentit Vladimir Putin në Kinë.
Ky do të ishte udhëtimi i parë i Putinit në një vend, fuqi e madhe globale, që nga fillimi i ofensivës në Ukrainë.
Ndryshe, varësia strategjike e liderit rus nga Kina është rritur vetëm pasi pushtimi i tij në Ukrainën fqinje e futi vendin e tij në izolim ndërkombëtar.
Pekini po pret përfaqësues të 130 vendeve nga e marta deri të mërkurën për të shënuar një dekadë të një projekti kyç gjeopolitik të presidentit Xi Jinping për të zgjeruar shtrirjen globale të Kinës. /Telegrafi/