Presidenti rus Vladimir Putin ka nënshkruar dekretin me të cilin i jep shtetësinë ish-bashkëpunëtorit të shërbimeve të inteligjencës amerikane, sinjalizuesit Edward Snowden.
Snoëden ishte arratisur nga Shtetet e Bashkuara dhe kishte kërkuar azil në Rusi, pasi që në vitin 2013 publikoi dosje sekrete të operacioneve të inteligjencës amerikane sa i përket përgjimit qoftë jashtë apo brenda vendit, transmeton Telegrafi.
Pasi që ia kishte dorëzuar këto dokumente gazetarëve të Washington Post dhe The Guardian, Snowden ishte larguar nga Shtetet e Bashkuara dhe kishte shkuar në Hong Kong, e nga Hong Kongu drejt Moskës.
Në Moskë kaloi një kohë të pacaktuar në një zonë tranziti në aeroportin Shermetyevo, ku më pas presidenti rus i dha azil të përkohshëm në një kohëzgjatje prej një viti.
Në gusht të vitit 2014, mori lejeqëndrimin trevjetor, që i mundësoi të udhëtojë jo vetëm brenda Rusisë por edhe të largohet nga ai vend.
Pasi që mori lejeqëndrimin e përhershëm, në nëntor të vitit 2020 është bërë e ditur që Snowden ka kërkuar t’i jepet shtetësia nga Rusia.
Autoritetet amerikane prej vitesh kërkojnë që Snowden të rikthehet në Shtetet e Bashkuara, për t’u ballafaquar me drejtësinë nën akuzën për spiunazh. /Telegrafi/