Ashtu siç kishte paralajmëruar, këngëtarja shqiptare me famë botërore, Rita Ora, ka publikuar këngën e saj më të re.
“How to be lonely” titullohet kjo këngë, e cila përkthyer në shqip do të thotë “Si të jesh i/e vetmuar”.
Për kompozimin e kësaj kënge është kujdesur sensacioni i momentit në Angli, producenti dhe këngëtari Lewis Capaldi, i cili fitoi dy çmime ‘Brits’ sivjet.
![Rita Ora - How To Be Lonely [Official Audio]](https://i.ytimg.com/vi/HjLpyqMXr6w/hqdefault.jpg)
Rita e publikoi këngën e re në mesnatë në të gjitha platformat online të muzikës, teksa më pas edhe në kanalin e saj zyrtar në YouTube, në versionin audio.
Shumë shpejt, artistja me origjinë shqiptare pritet të publikojë edhe klipin e “How to be lonely”, në të cilin do të shfaqet në disa skena mjaft atraktive dhe provokuese, disa prej të cilave i ka ndarë me ndjekësit e saj në rrjetet sociale.
“How to be lonely” është kënga e parë e Rita Orës për vitin 2020, njëherësh kënga e parë solo që pas publikimit të albumit “Phoenix” në vitin 2018, sukseset e të cilit vazhdon ende t’i shijojë.
Në një letër të ndarë me fansat në rrjetet sociale pak ditë më parë, 29-vjeçarja kishte shkruar se për këtë këngë është frymëzuar nga periudha të ndryshme në jetën e saj. /Telegrafi/
