Mediumet bullgare kanë publikuar audio-inçizimet e dialogut që kanë pasur kontrollorët në Maqedoni dhe piloti që ka drejtuar aeroplanin “Cesna”, i cili dje u rrëzua tek “Maja e Selanikut”.
Sipas inçizimeve, babai i familjes Georgi Boshnakov ka vendosur kontakt me kontrollorët pasi ka ndjerë turbulenca derisa ka drejtuar aeroplanin, përcjell Telegrafi Maqedoni.
Në një moment kontrollori e pyet Boshnakovin nëse ka vërejtur akoma turbulenca, e ai është përgjigjur se nuk ka, por ka pasur mjegulla të mëdha.
Komunikimi së pari është bërë në gjuhën angleze, ndërsa më pas në atë maqedonase. Një nga kontrollorët e ka udhëzuar pilotin për në perëndim, ndërsa më pas ka humbur edhe komunikimi mes tyre.
Më pas dëgjohet dialogu mes kontrollorëve të fluturimit:
“Mund të shkojë mbi Majën e Selanikut, nuk ka mjegulla, sigurt është pastër me bazë prej mbi 300 metra mbi maje”.
“Po, por piloti tha se ka turbulenca dhe nuk është në radar”.
Bisedat që janë realizuar gjatë aksidentit mund t’i ndiqini në këtë vegëz, ndërsa biseda mes Boshnakovit dhe kontrollorëve fillon nga minuta 11:30./Telegrafi/