Gregory Kehoe, Joe Reeder, “Greenberg Legal Associates” dhe anëtarët e kësaj kompanie, kanë kërkuar të tërhiqen nga mbrojtja e Hashim Thaçit në rastin e tij në Gjykatën Speciale në Hagë.
Për këtë kanë reaguar nga Ministria e Drejtësisë të cilët përmes një njoftimi kanë thënë se pagesa për mbrojtjen e Hashim Thaçit janë realizuar për vitet 2020, 2021, 2022 dhe 2023, ndërkaq MD potencon se realizon pagesa vetëm për avokatë me të cilët ka marrëveshje, në përputhje me legjislacionin në fuqi.
Ndaj këtij njoftimi ka reaguar edhe ish këshillitari i presidentit, Hashim Thaçit, Adil Behramaj i cili ka thënë se me sa nguti dhe ‘transparencë’ MD-ja i publikon shpenzimet e avokatëve për ish-krerët e UÇK-së në Hagë, të cilat siç u shpreh ai do të duhej të ishin informacione të klasifikuara për shkak të rëndësisë shtetërore.
“Që të mund t’i përdorin dhe përmendin kështu, këta edhe aktet nënligjore i kanë ndryshuar për t’i publikuar shpenzimet individuale dhe jo shpenzimet në total, siç kanë qenë më herët. Po ashtu, me vendim të kryeministrit Kurti është ulur edhe niveli i klasifikimit”, ka reaguar Behramaj përmes një postimi në rrjetin social në Facebook.
Ndërsa, siç u shpreh ai shpenzimet e Prindon Sadriut, bashkëshortit të presidentes Osmani, i mbajnë fshehur edhe pas vendimit të Agjencisë për Informim dhe Privatësi, e cila i gjobit dhe sërish nuk i bëjnë publike.
“Ata që janë në Hagë, familjet e tyre, familjet që sakrifikuan për këtë vend, do ta kalojnë edhe këtë sfidë. Por, shumë shpejt, disa do të mbesin përjetësisht të turpëruar”, ka shkruar ndër të tjera, Behramaj. /Telegrafi/
