Telegrafi

PSG vazhdon me fitore në Ligue 1, mposht Strasbourgun

Shkumbin Pireva

Paris Saint-Germain ka fituar me rezultat 4-2 ndaj Strasbourgut në ndeshjen e vlefshme për javën e dytë në Ligue 1.

Kryeqytetasit kanë vazhduar serinë pozitive duke marrë edhe fitoren e dytë në ndeshjen e dytë në kampionat të zhvilluar në Parc des Princes.

Pjesa e parë e takimin u përshkua me dominim total të vendasve, të cilët përveç rasteve arritën të shënojnë edhe tri gola.

Goli i parë i ndeshjes erdhi pas vetëm dy minuta lojë dhe ishte Mauro Icardi, i cili me kokë shënoi për 1-0 pas asistimit të Abdou Diallo.

Kylian Mbappe (25’) u përkujdes për epërsinë 2-0, ndërsa Julian Draxler (27’) shënoi për 3-0 dhe me këtë rezultat ekipet shkuan në pushim.

Në pjesën e dytë, përsëri PSG ishte skuadër më e mirë, por mysafirët e vendosen në rrezik duke shënuar dy gola të shpejtë.

Kevin Gameiro (53’) shënoi fillimisht për 3-1, ndërsa Ludovic Ajorque (64′) u përkujdes ta bëjë lojën edhe më interesante duke ngushtuar rezultatin në 3-2.

Megjithatë, PSG nuk lejoi asnjë befasi pasi përveç që mbrojti rezultatin arriti të shënojë edhe një gol me anë të Pablo Sarabia (86’), i cili vulosi fitoren me rezultat përfundimtar 4-2.

Pas kësaj fitore, parisienët e shohin veten në pozitën e parë më gjashtë pikë, ndërsa Strasbourg zë vendin e fundit me zero pikë.

Në ndeshjen e radhës, PSG udhëton te Brest, ndërsa Strasbourg e pret Troyesin. /Telegrafi/