Banorët e fshatit Shtupeq i vogël i Rugovës, kanë protestuar, sepse sipas tyre, fshati është anashkaluar për dallim nga fshatrat e tjera të Rugovës. Ata kanë kërkuar nga Komuna e Pejës, që të bëhen më shumë investime në infrastrukturë.
Ndërsa, nga Komuna thonë se rruga që po ndërtohet nga Peklana, do të jetë fitimprurës për Shtupeqin e vogël.
Banorët e fshatit Shtupeq i Vogël të Rugovës kanë protestuar në mënyrë paqësore. Ata thonë se fshati i tyre po anashkalohet.
Sipas Ali Ibërdemaj i cili njëherit është përfaqësues i fshatit ka thënë se fshati Shtupeq i Vogël është i vetmi që s’ka infrastrukturë të denjë për zhvillim të mëtejshëm të turizmit.
“I vetmi është fshati ynë që nuk ka infrastrukturë, i vetmi është fshati ynë që nuk kujdeset askush, i vetmi është fshati ynë që nuk ka investuar askush”, deklaroi për RTV Dukagjinin, Ali Ibërdemaj.
Nazmi Ibërdemaj, siç përcjell Telegrafi, ka treguar se cilat janë kërkesat e banorëve.
“Të niset me rekonstruktimin e kësaj rruge e cila është jetike për fshatin tonë, duke pasur parasysh se rruga është ndërtuar me vet kontributin e banorëve të fshatit. Por koha e ka bërë të vetën që kjo rrugë të jetë gati e papërdorshme”, shprehet banori Nazmi Ibërdemaj.
Haxhi Kastrati i cili vjen nga ky fshat, thotë se nuk e dinë as ata përgjigjen se pse janë lënë anash sa i përket investimeve infrastrukturore.
“Dua të pyes qeverinë qendrore dhe atë komunale se pse fshati ynë është i anashkaluar totalisht. Nuk kemi rrugë , shkollë e as ambulantë”, tha banori tjetër Haxhi Kastrati.
Banorët kanë paralajmëruar që nëse komuna nuk ndërmerr masa për këtë çështje, do të ketë edhe protesta të tjera ku edhe do pengojnë lëvizjen e lirë të automjeteve në Rugovë.
Në anën tjetër, Durim Sheremeti shef i kabinetit të kryetarit të Pejës, Gazmend Muhaxheri, i ka thënë RTV Dukagjinit, përmes telefonit se rruga e cila po ndërtohet nga Peklena lidhet direkt me grykën e Rugovës. Sipas Sheremetit, do të jetë shumë fitimprurëse për fshatin e Shtupeqit të vogël ngase është fshati i parë që lidhet me këtë rrugë./Telegrafi/