Gjatë protestës së sotme për shtrenjtimin e rrymës përpara Qeverisë së Kosovës, kryetari i PSD-së, Dardan Molliqaj, e ka goditur me shuplakë në fytyrë një pjesëtar të Policisë së Kosovës.
Protesta e sotme e organizuar nga Partia Socialdemokrate kundër rritjes së çmimeve të energjisë elektrike në një moment ka eskaluar.
Në përpjekje për të mbajtur fjalim në shkallët e objektit të Qeverisë, drejtuesit e PSD-së janë përplasur me policinë, transmeton Telegrafi.
Në një moment, kryetari i PSD-së, Dardan Molliqaj, duke kërkuar nga policët që t’ua lirojnë hapësirën në shkallët në hyrje të ndërtesës së Qeverisë, në një video shihet duke e goditur me shuplakë në fytyrë një zyrtar policor.
Pas protestës së sotme, të organizuar nga Partia Socialdemokrate (PSD) kundër shtrenjtimit të rrymës, ka reaguar zëdhënësi i Qeverisë së Kosovës, Përparim Kryeziu, i cili ka thënë se kishte përpjekje për ta eskaluar protestën.
Ndryshe, protesta e sotme nga KMDLNj është vlerësuar e qetë. /Telegrafi/