“Ai është super i shoqërueshëm dhe i relaksuar, kështu që neve kurrë nuk na kanë nxjerrë jashtë një restoranti apo kafeneje”.
Kështu e përshkruan Abby Gerdin (26) kafshën e saj – pëllumbin Pidge. Ai është shumë i ndjekur në rrjetet sociale, ku ka miliona fansa.
Vajza e shpëtoi pëllumbin nga ngordhja e sigurt në maj të vitit 2023 dhe që atëherë ata janë të pandarë.
“E gjeta në një enë, në disa mbeturina. Ai ishte foshnjë, nuk mund të fluturonte dhe nuk duhej të largohej nga foleja”, shpjegoi zhvilluesi nga Brooklyn.
Abby fillimisht e çoi pëllumbin në “Wild Bird Fund”, organizatë për kujdesin e kafshëve dhe më pas vendosi ta mbante si kafshë shtëpiake, raporton New York Post.
“Nuk kam pasur kurrë një zog për kafshë shtëpiake, e lëre më një pëllumb. Megjithatë, e dija se mund ta zbutja. Ky është fëmija im. E laj, e ushqej, madje e stërvit të shkojë në tualet”, tregon vajza.
Është veçanërisht interesante se si Abby e “transporton” kafshën e saj, qoftë me taksi apo metro.
“Nëse do të dal për pije apo darkë, thjesht e vendos në një çantë lëkure dhe shkojmë”, tha ajo.
Dyshen e pazakontë mund ta shihni në New York, në bare të famshme, apo në festa private. Pigeon Pidge është shumë miqësor, siç dëshmohet nga video të shumta në Tiktok. /Telegrafi/