Klubi kryeqytetas, Prishtina ka fituar në udhëtim te Peja me rezultat 84:64 në ndeshjen e vlefshme për gjiron e dytë në Superligën e Kosovës në basketboll.
Prishtina ka fituar pa befasi edhe ndeshjen e dytë në Superligën e Kosovës, duke mposhtur rivalin e kamotshëm, Pejën në sallën e sporteve në “Karagaçi”.
Kampioni i Kosovës ishte më i mirë gjatë gjithë ndeshjes duke mos lejuar asnjëherë befasi dhe afrim të rezultatit.
Çereku i parë në këtë ndeshje përfundoi 16:9 në të mirë të Prishtinës, ndërsa pas 20 minutave të parë semafori shënonte 41:27 për bardhekaltrit.
Edhe pjesa e dytë vazhdoi me avazin e vjetër, me Prishtinën që vazhdonte të ngrite epërsinë derisa pas çerekut të tretë rezultati shënonte 61:42.
Çereku i fundit ishte më i barabarti nga të gjithë, me Pejën që shënoi 22 pikë dhe Prishtinën 23 sosh, duke përmbyllur kështu ndeshjen me fitore 84:64
Te Prishtina më të dalluarit në këtë ndeshje ishin Andrew Lawrence me 21 pikë e 11 asistime dhe Maxie Esho 22 pikë dhe 11 kërcime.
Ndërsa, te Peja dy basketbollistët më të dalluar ishin Arti Hajdari me 17 pikë të shënuara e tri asistime, Leonard Mekaj me 13 pikë e tetë asistime si dhe Beq Kovaçi me 14 pikë e nëntë kërcime. /Telegrafi/