Bogdan Tanjeviq ka mbetur i befasuar me paraqitjen e Sigal Prishtinës në ndeshjen e dytë finale të Ligës Ballkanike në basketboll.
Tanjeviq, që vlerësohet legjendë e basketbollit evropian, ka ndjekur nga afër ndeshjen e fundit të edicionit të Ligës Ballkanike, të luajtur më 20 prill në Tivar në mes të Mornarit dhe Prishtinës. Fitoi Mornari, por Prishtina e fitoi titullin pasi kishte fituar më thellë ndeshjen e parë të luajtur në Kosovë.
Tanjeviq, 69-vjeçar, aktualisht është përzgjedhës i Malit të Zi. Ai ka lindur në Mal të Zi, ndërsa ka një jetë në basketboll, përcjell Koha Ditore.
“Jam vërtet i befasuar me kualitetin e Sigal Prishtinës. Natyrisht se e kam njohur Mornarin dhe kam menduar se është skuadra më e mirë në Ligën Ballkanike. Është hera e parë që e shoh Prishtinën dhe mund të them se është skuadër e shkëlqyeshme me lojtarë të shkëlqyeshëm. Kam njohur vetëm Dardan Berishën nga koha e tij me përfaqësuesen e Polonisë dhe ai është lojtar ofenziv fantastik”.
“Amerikanët e Prishtinës janë po ashtu shumë të mirë. Prishtina ka qendër të shkëlqyeshme dhe plejmejkerin e ka lojtar për skuadër”, ka thënë Tanjeviq gjatë ndeshjes finale, ka njoftuar sajti i Ligës Ballkanike.
Tanjeviq ka edhe shtetësi të Italisë, Bosnjës dhe Turqisë..