Kreu i grupit mercenar rus Wagner, Yevgeny Prigozhin, i dyshohet se humbi jetën mbrëmë nga rrëzimi i aeroplanit, ka publikuar pak ditë më parë video e parë pas rebelimit që organizoi në fund të qershorit.
Videoja, që besohet të ketë origjinën në Afrikë, u shfaq të hënën në kanalet Telegram të lidhura me grupin Wagner, transmeton Telegrafi.
“Temperatura është mbi 50 gradë Celsius, gjithçka si duam. Wagner e bën Rusinë edhe më të madhe në të gjitha kontinentet, dhe Afrikën – më të lirë. Drejtësi dhe lumturi për popullin afrikan, ne jemi një makth për ISIS-in dhe Al Kaedën dhe banditët e tjerë”, tha Prigozhin.
Ai gjithashtu deklaroi se Wagner është duke rekrutuar njerëz dhe se grupi do të “përmbushë detyrat e përcaktuara”.
E ardhmja e Wagner dhe Prigozhinit ka qenë e pasigurt që nga qershori, kur ata organizuan një rebelim kundër institucionit ushtarak rus, dhe Kremlini tha më pas se Prigozhin dhe disa nga luftëtarët e tij, të cilët luftuan në disa nga betejat më të vështira në Ukrainë, do të shkonin në Bjellorusi.
Pas rebelimit, disa anëtarë të Wagner u zhvendosën në Bjellorusi dhe filluan të trajnojnë ushtrinë.
Kujtojmë se një aeroplan u rrëzua dje në rajonin Tver me dhjetë pasagjerë, mes të cilëve dyshohet se ishte edhe kreu i Wagner-it, Yevgeny Prigozhin. Të gjithë pasagjerët humbën jetën kur aeroplani u rrëzua. /Telegrafi/
Prigozhin published the first video since the failure of the rebellion
The head of PMC "Wagner" recorded a video from Africa and said that he "performs there the tasks that we promised to solve". The terrorist also called for volunteers to join the PMC to "defend the freedom of… pic.twitter.com/9ibXb5c30S
— NEXTA (@nexta_tv) August 21, 2023