Presidenti i Rumanisë ka thënë se nëse pjesë të një droni rus konfirmohet se kanë rënë në territorin rumun, kjo do të përbënte një shkelje të rëndë.
Klaus Iohannis i quajti sulmet ndaj infrastrukturës ukrainase në rajonin e Danubit një krim lufte, raporton skynews.
“Nëse konfirmohet se komponentët i përkasin një droni rus, një situatë e tillë do të ishte e papranueshme dhe një shkelje serioze e sovranitetit dhe integritetit territorial të Rumanisë”, tha ai.
Komentet e presidentit vijnë pas sulmeve të përsëritura me raketa dhe drone ruse në rrethin Izmail, në kufi me Rumaninë.
Ministri rumun i Mbrojtjes, Angel Tilvar u tërhoq prej pozicionit fillestar duke mohuar incidentin.
“Unë konfirmoj se janë gjetur pjesë që mund të jenë elementë të një droni”, tha ai për Antena 3 CNN.
Ndryshe, forcat ruse edhe sot kanë sulmuar portet ukrainase me fluturake pa pilot – duke goditur disa objekte në Izmail dhe Danub, ku si pasojë ka humbur jetën një person (civil). /Telegrafi/