Emmanuel Macron i ka hedhur poshtë si ‘demagogji’ thirrjet e disa shteteve evropiane, që t’i ndalohet Arabisë Saudite shitja e armëve, shkaku i vrasjes së gazetarit Jamal Khashoggi.
“Çfarë lidhje ka mes shitjes së armëve dhe vrasjes së zotëri Khashoggit” ka thënë presidenti francez gjatë një konference për shtyp në Sllovaki, duke shtuar se gjërat nuk duhet të ‘përzihen’ vetëm për të kënaqur masën – që jo gjithmonë është njohës i mirë i rrethanave, transmeton Telegrafi.
Sipas Macron, ai e kupton se çfarë po ndodhë në Jemen, por kjo nuk ka lidhje me vrasjen e gazetarit, teksa e ka quajtur demagogji të thuhet se ‘duhet të ndalojmë tregtinë me armë me arabët’. “Nuk ka asgjë të bëjë me Khashoggin” ka përfunduar Macron.
Gjermania zyrtare ka bërë të ditur se ka ndaluar tregtinë me armë me Arabinë Saudite, derisa të zgjidhen rrethanat misterioze të vrasjes së gazetarit Khashoggi, që ndodhi në konsullatën arabe në Stamboll të Turqisë. /Telegrafi/